قصيدة مرثية الغالي للشاعرة غادة العاشق

الا يالله يـارب الخلايـق ربنـا الرحـمـن
انا عبداً ضعيف ومنكسـر والـذل كاسينـي
دعيتـك ترحـم الغالـي الا يالله يامـنـان
تحت ذاك الثرى عطري واجملهـا رياحينـي
الا يالله تهدينـي لعفـوك ياكبيـر الـشـأن
وترحم قرة عيونـي وضحكاتـي ومبكينـي
بكيتك يايبه والدمع ماخفـف مـن النيـران
وانا نيران قلبي بالحشا بالجـوف تصلينـي
بكيتك وانفطر قلب وخمد فرح وبـدا بركـان
واردد حسبـي الله ربنـا يـارب تهديـنـي
ذكرتك يوم كلن نام وجفنه للغفـى نعسـان
وماضي الوقت مايرجع؟وانا ماعاد يمدينـي
زمن لو عاد لي لحظه اكن للحظتي عرفـان
اعيش بلحظتي بسمه عسى البسمه تسلينـي
حبيبي لو يجي صوته بسمعي بي تعود ازمان
زماناً كانت ابسط لعبـةٍ بالكـون ترضينـي
اجي مجلسك يالغالي وأبهـر دلتـك باتقـان
واحس انك هنا عايش لو انك غبت عن عيني
ياغالي كل ماناظرت فنجالك وانـا شفقـان
وانا شفقان لو ترجـع بفنجالـك تقهوينـي
هنا مجلسك هنا مركاك هنا قد كان ياما كان
وهنا قد كان ياما كان وهنا الحيـن كاوينـي
مكانك ماخلا لكن سكنـت بداخـل الوجـدان
بنبض القلب بالدمعات بالضحكـات حاوينـي
واسولف ثم اسولف ثمٍ ابكي بدمعي الهتـان
وافز احسب تنادينـي وانـا ادري ماتنادينـي
الا يالله يامفـرج همومـي ربـي السلـوان
وانا ماسلاه لكن اني لـي الدعـوه تعزينـي
عزاي انك فقيداً عند رب (ن) يكسي الغفران
وعزاي اني بعد موتك حروف اسمك تخاويني
تخاويني دروب الطيب لان الطيب دربك كـان
وبعد موتك لي السمعه وطيب الذكر يكفينـي
بعد موتك الا قالو رحمه الله رحمـه فـلان
رحمك الله ياشمعة حياتي وشمعـة سنينـي
وانا ماانساك ياقرة عيوني وادعـي الحنٌـان
انـا ويـاك يجمعنـا بجناتـه ويسقيـنـي
ونشرب من نهر عفوه بيوماً تشخص الاعيان
ويضللنا بضله يوم حـر الشمـس تكوينـي
الا يالله تحرم جسمه الطاهر علـى الديـدان
الا يالله يـاربــي الا يالله ااااااامـيـنــي
وانا والله لو انسى الخلايق واعلن النكـران
انا ماانساك لو صار الثرى فوقـي يغطينـي
ولو صار القبر موطن وحنا للقبـر اوطـان
انا لك موطـن بقلبـي بنيتـه قبـل يبنينـي
ولا يالله ياربـي انـا عبـداً فقـد انـسـان
فقد شوفه فقد قلبـه فقـد حضنـاً يدفينـي
ولا يالله يـارب الخلايـق ربنـا الرحـمـن
انا حالي ضعيف ومنكسـر والهـم طاوينـي