لا شفت الطيب في اياة واحـد .. { مهو مري} تلاقينـا خوالـه

السلام عليكم ورحمة وبركاته

صبحكم خير ورضا وعافيه ..

هذي قصيده مدح في قبيلة آل مره .. وبدون قصور في باقي القبايل كلن فيه حقه ..

والقصيده للشاعر / حمد البريدي..

يقول الشاعر اللـي لا بـدا لـه
على المدح وتهيـا فـي مجالـه

بداها ولـد ابـن علـوش وآنـا
على نهج المجارى عدتهـا لـه

يجمعنا محلـف والمجـد كايـد
واقول المجد ما ينسـى رجالـه

ورثنا العز مـن كابـر وكابـر
وخذنا الفخر من جالـه لجالـه

خلقنـا الله بيـن النـاس نـدر
ولهل الظلم .. ميـزان العدالـه

يا بوي المري اليا جاك يعـرف
بشوش الوجه .. وبسكبة عقالـه

وإلى منه وعـد فابشـر بعـزك
وإلى منه فزع .. جاك بعجالـه

وإلى منه عطى .. ما قال شوفو
يمـد يمينـه ويجحـد شمـالـه

عليـه بالحـرام ان آل مــره
زعيميـن المراجـل لا محالـه

كــأن الله خلقـنـا للطليـعـه
سلاطين الرجال بكـل حالـه !!

( سلام الله علينـا يـا آل مـره
سـلام" نستحـقـه ونعنـالـه )

بغيت البحـر .. ولا فالعلالـي
بغيت البـر .. تعرفنـا رمالـه

فوجه الطيـب حطينـا مـواري
وخططنا علـى قمـة جبالـه !!

بداوة اصل فـي قمـة تحضـر
سماح اجناب .. في قوة بسالـه

عدالة راي .. في سطوه ونخوه
سعوط مجنن .. في كـل قالـه

وإلى منه زبنـا .. مـن زبنـا
فتحرم كبة الدلـه .. دلالـه !!

وإلى منه .. نصانا الضيف عاني
تخير فالغداء ولا العشاء لـه !!

وإلى منه .. عثـر فينـا حدانـا
تكاتفنا وصرنا .. كلنـا لـه !!

وإلى منه خطاء المخطي سمحنا
وإلى من عادها .. فآي الفنا لـه

وإلى منه .. زهمنا مـن تعسـر
جميع اللي لنـا يصبـح حلالـه

بصمنا في مدار الوقـت بصمـه
سجل لا احتمـا العـز احتمالـه

مواقيف .. يوقف شعـر راسـي
تحد الفكر .. ياصـل لانذهالـه

حروب دون ما اذكرها وافسـر
حفرها العز .. وامنعها الازالـه

وإلى من جيت بذكر لي حداهـا
نهار الرجل .. روحه دون حاله

تجمـع حولنـا سبعـة قبـايـل
ولا من بينهم ربط وزمالـه !!!

( طحناهم مثل طحـن الشعيـره
رحانا تحتهم .. كنها محاله !! )

نبيـع اروحنـا .. دون المعـزه
ونرخصها لجل عنـق الغزالـه

بني مره .. وإلى من قلت مـره
أوقف وافتخـر فاصلـي وآلـه

آل الفزعات .. وآل العـز كلـه
آل الامجـاد والفخـر وزلالـه

تعزوى فأصغر عيـال آل مـره
حرام ان ينطح العايـل لحالـه

كـذا حنـا ولا حنـا نتغـيـر
على عادتنا .. في كل حالـه !!

من وجيه العرب نعرف خفاهـا
ومن هرج الفتى نعرف خصالـه

ومن باب الغلا نعـز المعرفـه
رفيق الجنب ما يدعس ظلاله !!

فإلى شفنـا رفيـق مـا يجينـا
ما يردعنا غيابه عـن وصالـه

نجي له .. لاننـا وافيـن جـداا
ووافين ٍ الـى حـد الثمالـه !!

شجاعة تستمـد مـن الشجاعـه
نبالـة خلـق فـي قمـة نبالـه

وإلى منا عطينـا وجيهنـا حـد
يا سعده من عطينا وجيهنـا لـه

ينـام الليـل وعيونـه قريـره
نموت ولا نتناسـى وعدنـا لـه

لنا بيـرق علـى العليـا نـرزه
ولنا سيف يـروع بانسلالـه !!

انا ما امدح كذا من باب مدحـه
لكن المـدح ياتـي لـي لحالـه

حيـاة مـا بهاعـزه وطـولـه
يا جعل امحق حياة ويشهـا لـه

رح اسأل ماضي العهـد وتنشـد
من اللي لا نـوى مجـده ينالـه

رقينا المجد مـن ذروة سنامـه
وخذنا المرجلـه رسـم ودلالـه

مقابيس الوغى لا مـن سرينـا
غـدا عقالنـا فيهـم جهالـه !!

جهالة عـز مـا هـي تنتعيـن
سوى عند القروم اهل الشكالـه

نوردها علـى حـوض المنيـه
ليا بعض العرب جـاه انسحالـه

نحـل المعضـلات ان عقدوهـا
ونمحي ذكر مـا ننـوي زوالـه

وهل لبل فالعصـور الجاهليـه
وكلن يحتمي عـن راس مالـه

كرمنا لو لحق حاتـم عصـوره
ما كان الوقت شال اسمه وشالـه

فحول الطيب وعيـال الحمايـل
مثال للزمن .. واسمـع مثالـه

( لا شفت الطيب في اياة واحـد
مهو مري .. تلاقينـا خوالـه )

نمثـل دولـة ونحكـم جزيـره
من آخر حايل لآخر صلالـه !!

رجال لو يشين الوقـت عـادي
يحبون الكـرم طيـش وخبالـه

نكرم مـن تـذرى فـي ذرانـا
وعلينا نذر ما ينضـاق.. بالـه

ولا به فرق في مري وعجمـي
جمعنـا يـام لاول فـي ظلالـه

ودون قصور في بـاق القبايـل
لكن المدح فـي ربعـي رجالـه

سـلام الله علينـا يـا آل مـره
سـلام نستحقـه ونعنـا لـه !!

مشكور الله يعطيك العافيه

على الطرح المميز

لك جزيل الشكر

لاهنت يابو عبد الله

ذوق في غاية القمه

لك مني اجمل تحيه

مشكورين على المرور العطر

مشكور ابو عبدالله
على الطرح الرائع
وتقبل مروري

اسعد الله قلوبكم وامتعها بالخير دوماً

أسعدني كثيرا مروركم وتعطيركم هذه الصفحه

وردكم المفعم بالحب والعطاء

دمتم بخير وعافية

لكم خالص احترامي

» الطيب لا تستغربه من هـل الطيـب
» قصيده جزله ومحبوكه وفالك الطيب
» قصيده جزله ومحبوكه وفالك الطيب