مدح القبايل

ارض بها قحطـان وافيـن الاشبـار **** وياعـز منهـم بالشدايـد بسيـده

واذكر عتيبه يوم للطيب مغـوار **** لا ثـارت الهيجـا وقـرب ضديـده

وشمر هل الطولات والجود مقدار **** اهل الكرم واهل الفعـول الحميـده

وقوم اعنزه مروين الاخصام الامرار **** اولاد وايـل مـن عصـور عهيـده

ومطير قوم تكرم الضيف لا زرار **** وياويـل خصـم فـي حراهـم وعيـده

واذكر قبيلة حرب يانعم الاخيـار **** وتاريخهـم يحكـي سطـور مجيـده

وسبيع نعم القوم ووجيه الاسفار **** زبن الدخيل ليـا زبـن مـن طريـده

واذكر قبيلة يام والطيـب ينـدار **** اهـل العلـوم الوافيـه والرشيـده

ثم الدواسر تجعـل الخصـم منهـار **** عيـال زايـد عـز منهـم سنيـده

ثم السهول اللي لها الطيب مدرار **** وعن منهج العادات ماهـي محيـده

ثم اذكـر العجمـان حمايـة الجـار **** والمرجلـه والجـاه فيهـم عتيـده

واذكر بني مره طويليـن الاعمـار **** مـا ينقـد المـري ولا لـه نقيـده

ثم الهواجر لابة تقـدح النـار **** اهـل الركـاب اللـي خطاهـا بعيـده

واذكر بني خالد قبيلة وامار **** قوم لهـم فـي المجـد قـول ورصيـده

وبني تميم اللي لها الطيـب مصـدار **** بنـي تميـم وكـل فعـل تجيـده

ثم الزعوب اللي بها الخصم يحتـار **** شجعـان ماترضـى سـوا ماتريـده

العازمي وافي وفي الطيب بيطار **** روحه على كـل المصاعـب صميـده

ثم الظفيري في المصاعيب جبـار **** والطيـب والامـداح باصلـه وطيـده

ثم اذكر الاشراف بجلال واكبار **** اهـل الحجـاز اللـي تفـك الزهيـده

ثم الهذيلي له مواقف ومندار **** راعي الفخـر راعـي العلـوم السديـده

ثم البقوم اللي لهم جيش وامهار **** ريـف الضيـوف ليـا لفاهـم وليـده

واذكر ثقيف اللي لهم مجد وآثار **** ومهمـا حسبنـا مـن كـلام نعيـده

وبلحارث اهل العز بشهود واقـرار **** ا لحارثـي ياطيـب فعلـه وجيـده

والمالكي معروف لا صار ما صار **** في موقف اهل الطيب يبذل جهيـده

واثني تحياتي عدد وبـل الامطـار **** علـى سليـم وكـل خصـم تكيـده

واذكر جهينه هل مواقيف وادوار **** تلقى الجهيني راسم الطيـب بيـده

واذكر بلي والمجدله فعل واظهار **** وتاريخهـم يحكـي فعـول فريـده

وبني عطيه في المواجيـب حضـار **** قـوم بوقـت الجـد قـوم عنيـده

ثم الحويطي والكرامه لـه اشعـار **** ثـم الشـراري لـه فعـول مفيـده

ثم الرشيدي في الصعيبات صبـار **** علـى علـوم الطيـب فعلـه يزيـده

وباقي جنوب الدار والقاف مادار **** باقي علـى قلبـي كـلام واشيـده

زهران نعم القوم في وقت الاضرار **** والخصم عينه مـن لقاهـا سهيـده

والغامدي معروف له عزم واصرار **** راعي المراجـل والعلـوم المفيـده

وشمران قوم والجمايل لهـا اطـوار **** وبلقـرن سـم للقلـوب النكيـده

والاكلبـي والمحلفـي مابعـد بـار **** والحارثـي طيبـه وفعلـه يشيـده

وبني شهر وبني عمر سيـف بتـار **** قـوم علـى الاخصـام نـار وقيـده

والاسمري والاحمري صيتهم سـار **** بيـن القبايـل والمواقـف شهيـده

واذكر عسير الهول ذربين الاذكار **** وابها احتموها فالسنين الشديـده

وادهم والصيعر على حد الاقطار **** يحمون حد الدار مـن اللـي يريـده

وامشي مع الساحل مع جملـه افكـار **** رسمتهـا والطيـر زان اتغريـده

وانزل على جيـزان تاريـخ واديـار **** ورجـال فيفـا والقبايـل عديـده

وارجوا العذر واهل المواجيب عذار **** الي نسيته مانذكر في القصيـده

فالجهل شجعان وفي السلـم تجـار **** مـن بطـن بيشـه للتهـم لارفيـده

حبيت ابين موقفي بين شعار **** وارجـوا سموحتكـم علـى ذا النشيـده

ماحب انافق واتعنصر تعنصار **** ولا نـي باطيـع اهـل العقـول البليـده

ما كل من طب البحر قيل بحار **** وما كل من شل الفشـق جـاب صيـده

فالشعـر بستـان بـه ورد وازهـار **** واللـي تعداهـا بيوتـه فقـيـده

واقولها في الشعر تكرار وامرار **** ضـرف بـلا عنـوان يلغـى بريـده

وبعض السوالف له مواقف ومحضار**** وشعـر بـلا معنـى لـزوم نبيـده

وصلوا على المرسول شفـاع الابـرار**** محمـد الهـادي وقـدوة عبيـده