ديوان الشاعر سلطان الهاجري

موضوع: ديوان الشاعر سلطان الهاجري 17.05.10 0:11

السلام عليكم ورحمته وبركـاته . . .

الشـاعر سلطـان أبن وسام الهاجري . . شاعر مـن أعلام الشعر بالجزيره العريبه . . .ومن مشاهيرها

(الرفيق اللي لياغبت مايحمي قفاي)

الرفيـق اللـي لاغبـت مايحمـي قفـاي
اجل لامن صرت حاضر ماني في حاجته
احتمـي دوري ودور القبيلـه مـن وراي
جمـدوا هـرج الفراغـات ياهراجـتـه
كانها بمصامخ الـروس والا بـاي بـاي
خلـو الفلـم المدبلـج علـى دبلاجـتـه
طول عمري ماستمع من ضعيـف الـراي
راي ولاطمعت بديك خيبـر ولادجاجتـه
العداوه شي عـادي تجينـي مـن عـداي
من نسج نفس العـداوه عرفـت انساجتـه
وان كلاني مخلب من مخاليـب اصدقـاي
قلت ضاعت صيده في طـرف عجاجتـه
وان ثناهـا مـرت ثانيـه جعلـه افـداي
لامسـك كلـب الخواجـه كـلا خواجتـه
الارض ماهي ملك ابي والسما ماهي سماي
مير العوج لا اعترض لي عدلت اعواجته
افـرده وذوقـه لمستيـن مـن عصـاي
وادبـه تاديـب طفـل علـى دراجـتـه
لين ينسى عناد راسـه ويذكـر مستـواي
ينتبـه والا يسوهـج علـى سوهاجـتـه
في نظره الناس لون وهـو هـاي هـاي
والمـدوج مابعـد فـاق مـن دواجـتـه
ابك انا لو اشرب البحر مايقطـع ظمـاي
وانت مثل الضب يزحف تحـت عجاجتـه

..............................

رحــب وهــلا

يامرحـبـا ترحيـبـة ماقـالـهـا الا
البدو لا شافو بـروق المزنـه العقربيـه
من خاطر وقف من الفرحه ورحب وهلا
ياغايب ربـي خـذه منـي ورده عليـه
خليتنـي والعاشـق الولهـان ماينتخـلا
الا تخلي البدو عن حب الفرس والمطيه
تعال يالغالي ترى مافيـه داعـي تغـلا
ان الملـوح واقلطـي ياليلـه العامريـه
خليني اعبر عن شعور الغـلا واتسـلا
واجر لحن من لحون طروقي السامريـه
لين العروق الظاميه تشرب حنان وتمـلا
وانا علي احفظ غلاتك مثل حفظ الوصيه
واليا انفهق ليلك وصبحك ياحبيبي تجـلا
من لا مني في فرحتي لا رحم ميته وحيه
هرجك عسل حالي وريقك كوكتيل محلا
العام الاول ذايقه فـي فنـدق الفيصليـه
وان قلت لي ماذقت غيره قلت حاشا وكلا
الا العويدي لا ذعر فـي دلـة الشاذليـه
هذا العذر يكفيك من صاحبك يازين والا
ودعتك الله ياخوي ماوثـق فـي خويـه

................................

(راكــب اللـي حــسها تـسمعه مـن كـل صـوب)

راكب اللي حسها تسمعه من كـل صـوب*مثل زلزال الرعد فـي المـزون المظلمـه
كنها يـوم استـدارت وضاقـن الـدروب*فرخ شيهانٍ على الطلـع ينهـض مقدمـه
تلها جورج الخواجـه وعرضهـا الهبـوب*وأعلنوا بإطفاء الزقايـر وربـط الأحزمـه
إسم كبتنها خواجـة ماهـو بلبـاس ثـوب*أخذ من االفوتكا سك ومـن الشـي عدمـه
من سلايل شايبٍ ما جمـع غيـر الذنـوب*والديانة عكـس الإسـلام ماهـي مسلمـه
مايعرف يقول هـذي شمـال وذي جنـوب*الدليلـة بوصلـة والحـروف مترجـمـه
واهني اللي علـي رحلتـه يلقـي ركـوب*إن رجـع وألاتوفـى عسـى الله يرحمـه
إن نوى في مشرق الأرض وألا في الغروب*المهـم ينفـذ الــلازم الـلـي يلـزمـه
فاقدٍ لـي شيـخ قـوم غالـي ومحسـوب*محزمٍ في الضيق يابعـز منهـو محزمـه
والجفا من بين الأصحاب عيب من العيوب*والصداقـة مـن بنـى بيتهـا مايهـدمـه
والغلا والكره ما تسكـن إلا فـي القلـوب*بـس مابـه قلـب فيـه الثنيـن مخيمـه
والرجل لاصار بيـت مـذرى ومحجـوب*استـوى عنـد النشامـا وجـوده وعدمـه
أتحمل مزح الأصحـاب عذبيـن السلـوب*وأتخيـر وآكـل التمـر واطـش عجمـه
وأعرف الكذبة إليا جات من فـم الكـذوب*لاقعـد يرفـع لسانـه ويرخـي برطمـه
والطرب لامن جرفني مع اللحن الطـروب*أنسف البيت المدمدم علـى اللـي دمدمـه
واقفل الجوال عن راعي الغـوج الهـذوب*وأفصل التعميـم عـن بيجـري واعممـه
زلة الطيب مـا تجـرح متينيـن الجنـوب*عقب اللـي زلـةٍ مـن صحيبـه تفحمـه
ايه ياضيدان والنـاس حـارب ومحـروب*والأعـادي كـل واحـد بحبـره وقلـمـه

...................................

(في ربـوع بقيـق )

لايمي لاقلت احب بقيق واللّي حوله
اقطع الله نصيب أبوه وجعل ماله والي
جزء من دوله ، لكنّه في عيوني دوله
اعشقه واقدّره قدر الرّفيق الغالي
وكل ذكرى في ملفّات الغلا محموله
في ربوع بقيق جعل بقيق ماله والي
ياوجودي لاذكرت اللّيلة المأهوله
يوم جيت أحث رجلي ، والسّعد يبرالي
وانطحتني مثل ليل السّامري وطبوله
جيدها برقه يلوح ، وعودها ميّالي
افتقدت الذّاكره يوم انتثر مجدوله
ولا انتبهت ايلين طاحت غترتي وعقالي
وانتهى الشوط الإضافي ما كسبت الجوله
الله انّه يغفر ذنوبي ويرحم حالي
ذقت شيء من رحيق الشفه المعسوله
ليتني ماذقت منها شيء كان اشوالي
استحيت من الأمور اللّي مهي معقوله
ا لأمور اللّي لا تتسوَّى ولاتنقالي
واصبحت قصّة غرامٍ مالها حيلوله
مابقى الاّ اسم العنود ونمرة الجوَّالي

...................................

(يابـو العـيـون )

يابو العيون اللي هدبها مراييش
يابو الدلع يااللي شفاياك ذبله
ياما على شانك نويت المطاريش
وياما تبعتك شرق والناس قبله
واليوم كني شفت في الوضع تشويش
شيٍ مجمعت العلوم تحسب له
وش عاد لو تزعل علي الدراويش
أنا بدويٍ راح يتبع هواء... أبله
علط الرقاب اللي وبرها عكاريش
لاربعت قلبي يزين الطرب له
ننزل بها في منزلٍ مابعد نيش
روضٍ خضر عشبه خزاما وربله
في ليلةٍ يأتي مطرها رشاريش
هذا ربيع القلب عقبه وقبله
لاتحسبني عقب فرقاك ما أعيش
من لاحسب لي عادتي ماحسب له
حتيش لو بينتي الصد حتيش
لانيب عنتر ولانتيب عبله

.............................

(يـا خاطـر)

ان جيت يا خاطر عسى الله يحيِّيك
على الشّحم ومبهّرات الدّلالي
عند الرفيق اللّي يعزّك ويغليك
حيثك ولد عودٍ عزيزٍ وغالي
وان رحت يا خاطر فلاعندنا فيك
تغيب عنَّا شهور والاَّ ليالي
خذها على الذِّرعان منِّي وانا اخيك
الكذب ماهو من سمات الرِّجالي
لاراجيٍ غيرك ولانيب راجيك
في كل ميرادٍ طوالٍ حبالي
افتل واحل معقِّدات الشّرابيك
واشيل ما شالت ظهور الجمالي
ياما تصعلكنا وصرنا صعاليك
وياما تحمّلنا الحمول الثّقالي
للمرجله صرنا عبيدٍ مِماليك
وكفوفنا تندا من اوّل وتالي
لو كان مانملك رصيدٍ على شيك
اوجيهنا عند النشّاما طوالي
نشوم عن هذي ونِرهي على ذيك
وما حاشت ايدينا مهو راس مالي

للمزيد من مواضيعي

لا هنت

ابو عبدالله على الديوان الجميل

لاشك سلطان شاعر غني عن التعريف

لك تقديري

مشكورين على على المرورررررررر العطرررررررررر

لاهنت ابو عبدالله
على الموضوع الرائع
وتقبل مروري

اسعد الله قلوبكم وامتعها بالخير دوماً

أسعدني كثيرا مروركم وتعطيركم هذه الصفحه

وردكم المفعم بالحب والعطاء

دمتم بخير وعافية

لكم خالص احترامي

» محاوره بين الشاعر سلطان الهاجري والشاعر سعد بن جدلان
» من قصائد الامبراطور سلطان الهاجري
» حسين بن شتوي ،، مجاراة لــ سلطان الهاجري
» مهرجان المغترة 2008 محاورة سلطان الهاجري و مستور العصيمي الجزء الثاني
» محاوره نادرة وقويه جدا بين الشاعر حبيب العازمي و الشاعر محمد السناني 1414هـــ