((منتهى الذوق))
بكيت لجله ودمعي صار منثوره
ودموع عيني حشا ماتنتثر نثرا
مدري وش اللي بلاها وهي محظوره/
بوسط عيني ولا فكرت تتجرا
وانشهد الدمع لجله حيل معذوره
ومن يعرف الذوق يستسمح لها عذرا
كنت احسب انه بنفس الشكل والصوره
ويشابه الغيد اما بيض او سمرا
مثل البنات بكلمتين تصير مسحوره
وبنفس الاسلوب والمنظور والفكرا
ولقيت بأنه مميز داخله ثوره
ثورة عبث مختلف عالبال ماتطرا
يعبث باحاسيس قلبي هيج شعوره
يأمر وينهي وقلبي ماعصى امرا
كل المشاعر بسجن الذوق مأسوره
وبين الحنايا مكان السجن والاسرا
وماخذ العقل مايسمع سوى شوره
ياويل حالي من اللي ساحره سحرا
وجمرة الشوق ودتني على سوره
يامن يطفي سعير النار والجمرا
يامنتهى الذوق يادره وبلوره
حسره على ايام مالك طلة حسرا
مشكور ياوقت والساعات مشكوره
ومشكور ميعاد جمعنا مع القمرا
وحيث ماطل يعطي الناس من نوره
ويطرب المستمع بالشعر والنثرا
عساك دائم مع الايام مجبوره
والله يجعل دروبك دائما خضرا
الرئيسية 
موضوع: ((منتهى الذوق )) 
20.11.10 7:11
